ЎзМУ олимининг маърузаси халқаро конференцияда катта қизиқиш уйғотди

Москва шаҳрида 2019-йил 18-22 март кунлари Россия Фанлар Академияси

Стеклов номидаги Математика институтида “Комплекс анализ ва математик физика, Армен Глебович Сергеев 70 йиллигига бағишланган” халқаро конференция бўлиб ўтди. Бу конференцияда Италия, Германия, Польша, Хитой, Япония, Гонгконг, Испания, Болгария, Финляндия ва Россия мамлакатларининг кўзга кўринган математиклари ўз маърузалари билан иштирок этишдилар. Шу олимлар қаторида Ўзбекистон миллий университети Математика факультети “Математик анализ” кафедраси профессори, физика-математика фанлари доктори Гулмирза Худойберганов ўзининг шогирдлари билан бу конференцияда иштирок этди.

1 2

Профессор Гулмирза Худойберганов конференцияда “Кўп комплекс ўзгарувчили функциялар назариясида матрицавий соҳалар” номли мақоласини маъруза қилди. Бу маърузада кўп комплекс ўзгарувчили функциялар ёки кўп ўлчовли комплекс анализ бугунги кунгача етарлича қатьий тузилган назарияга эга эканлиги, шу билан бир вақтда классик (бир ўзгарувчили) комплекс анализнинг кўп саволларига шу вақтгача кўп комплекс ўзгарувчили функциялар назариясида аналоги мавжуд эмаслиги таъкидланди.

XX асрнинг ўрталарида математик олимлар Э.Картан, К.Зигель, Хуа Ло-кен ва И.И.Пятецкий-Шапиролар ўзларининг ишларида кўп комплекс ўзгарувчили функциялар назария масалаларини ечишда матрицавий ёндашув усулидан кенг фойдаланишган. Уларнинг ишларидатўртта классик соҳалар ва бу соҳалар билан боғлиқ бўлган функциялар назарияси ва геометриясининг масалалари ўрганилган.

Маърузада матрицавий соҳалар, матрицавий соҳаларда аниқланган даражали қаторлар, тўртта классик соҳалар билан боғланган матрицавий шарларнинг классификацияси, матрицавий шарларда топилган интеграл формулалар ва уларнинг тадбиқлари ҳақида сўз борди. Олинаётган натижалар чет эл журналларида чоп этилаётганлиги ваСибирь Федерал Университетида “Матрицавий соҳаларда анализ” номли монография чоп этилганлиги ва бу натижаларга кўп математик олимлар мурожаат этаётганликлари таъкидланди.

Қилинган маъруза конференция иштирокчиларига катта қизиқиш уйғотди. Улар ўзларининг саволлари билан мурожаат қилишди вакелгусида илмий алоқаларни йўлга қўйишга келишиб олишдилар.

Маъруза youtube.comканали орқали тўғридан-тўғри эфирга узатилди ва маърузани бутун дунё кузатиб борди. Ҳозирги кунда профессор Гулмирза Худойберганов томонидан қилинган маъруза Мустақил Давлатлар Ҳамдўстлиги математиклар портали math-net.ruсайтининг энг яхши маърузалар рейтингида 2-ўринда турибди. Сизга ҳам бу маърузани кўришни тавсия қиламиз (маърузани кўриш учун).

Конференция давомида профессор Гулмирза Худойберганов Россия Фанлар Академияси М.В.Келдыш номидаги Амалий математика институти директори,Россия Фанлар Академияси мухбир аъзоси, физика-математика фанлари доктори, профессор Аптекаров Александр Иванович билан Ўзбекистон миллий университети ўртасида тузиладиган халқаро ҳамкорлик ҳақида суҳбатлашдилар ва келажакда олиб бориладиган илмий ишлар ҳақида келишиб олдилар.

Шунингдек, Сибирь Федерал университети профессори, физика-математика фанлари доктори Цих Август Карлович билан физика-математика фанлари фалсафа доктори (PhD) ва фан доктори (DsC) бўйича илмий изланиш олиб бораётган докторантларнинг илмий янгиликларини амалиётга жорий этиш ҳақида суҳбатлашди.

Ўзбекистон Республикасида хизмат кўрсатган халқ маорифи ходими   Гулмирза Худойбергановга сиҳат-саломатлик тилаб, келажак авлодни юксак билимли қилиб тарбиялашда куч-қувват тилаймиз!

 

Улуғбек УСМОНОВ,

ЎзМУ газетаси мухбири

You may also like...

Добавить комментарий

Ваш e-mail не будет опубликован. Обязательные поля помечены *

Можно использовать следующие HTML-теги и атрибуты: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>