Дониш домла деганлари: Талабани эъзозланг!

Яхши домла талабани ҳеч қачон хафа қилмайди.

Ундан ҳам яхшироқ домла талабани ҳечам хафа қилдириб қўймайди!

***

Талабани эъзозлаш — домланинг энг ажойиб фазилатидир.

***

Биров билан боғлиқ ишинг битишига унчалик умид билан қарама, чунки, у ўша бировга боғлиқ… Биров эса – бировда…

***

Кўчирмакашнинг энг катта яхшилиги: оргинал асар (қўлланма, мақола ва бошқа ижод маҳсулини) ёзган асл Муаллифни машҳур қилиб юборади! Кўпсонли ўқувчилар ўша кўчирмакашга ҳам, у ўғирлаб ўз номидан эълон қилган асарга ҳам ва ниҳоят асл Муаллифга ҳам катта қизиқиш билан қарайдилар… Менинг бир ўқув қўлланмам шундай БАХТга мушарраф бўлибди!!!

***

Яхши одамнинг энг яхши фазилати: ёмонлашга лойиқ одамни ҳам ёмонламайди!

***

Бири биридан Яхши ишларим шу қадар кўпки, ёмон нарсаларни ўйлашга, бўлмағур гапларни эшитишга мутлақо вақтим йўқ…

***

Ўз қадрини билиш ўзгалар қадрига етишдан бошланади…

***

Мевали дарахтга тош отилади, деган мақол бор. Бироқ, ақлли, инсофли, виждонли одамлар мевали дарахтга асло тош отмайдилар! Керак бўлса, нарвон қўйиб мевасини авайлаб оладилар. Тош отадиганлар аслида ҳамма ДАРАХТларга бирдек аёвсиз завол етказаверадилар…

***

Бировдан хафа бўлишдан аввал ўша одамнинг ўзи билан очиқча гаплашиб кўринг. Шунда тушунмовчиликка барҳам берилади! Хафа бўлишга асло ҳожат қолмаслиги ҳам мумкин!! Ғийбатчининг гапи билан ёки қандайдир англашилмовчилик ортидан ўзича хафа бўлиш нодонликдан бошқа нарса эмас… Бундан фақат ўзингиз сиқилганингиз қолади…

***

Бойлик ортидан қувганлар ўзларини оддий, тинчгина яшаш бахтидан маҳрум қилиб қўядилар ва бу бахтга қайтиб эриша олмайдилар… (Ҳозиргача унақаларнинг оддий яшаш бахтига қайтиб эришганини учратмадим).

***

Вақтини яхши ишларга сарфлаётганларнинг ҳаммаси Яхши инсонлардир! Шу яхши жилғалар бирлашиб Эзгулик дарёсига айланмоқда ва Бахт-иқбол уммонини вужудга келтирмоқда!! Яхшилик йўлдошингиз бўлсин азиз Яхшилар!

***

Инсонга инъом этилган энг буюк неъмат — Меҳр. Меҳр билан умримиз гўзал ва файзли. Қанча кўп меҳр кўришни истасангиз, аввало ўзингиз ўзгаларга шунча кўп меҳр кўрсатинг. Меҳр кўрсатмаган одам меҳр кўрмайди…

***

Дам олиш куни мен учун дам оладиган эмас, кўпроқ чала қолган ишларимни поёнига етказиб оладиган кунимдир. Аслида шу ишлар менга ҳузур-ҳаловат бахш этади, мириқиб дам олганим шу бўлади.

Дониш домланинг деганларини оққа кўчирувчи:

Тўлқин ЭШБЕК