Давлатимиз раҳбари ташаббуси билан Олмазор тумани Қичқириқ канали бўйида маданият ва истироҳат боғи барпо этилиши режалаштирилган.
Шавкат Мирзиёевга мазкур парк лойиҳаси юзасидан маълумот берилди. Бу ҳақда Ўзбекистон Республикаси Президентининг Матбуот хизмати хабар берди.
Боғда болалар ва спорт майдончалари, замонавий аттракционлар ташкил этилади. Абдулла Қодирий ва Чўлпон номидаги кутубхоналар, Нуронийлар маскани қурилади.
Президентимиз кутубхоналарнинг пойтахт мактаблари билан ҳамкорлигини йўлга қўйиш, Абдулла Қодирий ва Чўлпон ижодини ёшларга чуқурроқ ўргатиш зарурлигини таъкидлади.
Аҳолининг дам олиши учун қулайликларни ошириш, хусусан, Нуронийлар масканида чойхона ва аския маркази ташкил қилиш, яқин жойда поликлика барпо этиш бўйича кўрсатмалар берди.
Президентимиз Тошкент шаҳрида «Хавфсиз шаҳар» концепцияси асосида олиб борилаётган ишлар билан танишди.
Давлатимиз раҳбари уйма-уй юриб, одамлар билан суҳбатлашиш, уларнинг муаммоларини ҳал қилишга кўмаклашиш, иш ўринлари яратиш, жаҳолатга қарши маърифат билан курашиш зарурлигини таъкидлади.
***
Президент Шавкат Мирзиёев барпо этилаётган “Наврўз” маданият ва истироҳат боғи лойиҳалари билан танишди
Бу ҳақда Ўзбекистон Республикаси Президентининг Матбуот хизмати хабар берди.
Анҳор бўйида бунёд этилаётган бу боғдаги барча иншоотлар маънавиятимиз, миллий қадриятларимизни ифода этади. Боғда “Наврўз” байрами тантаналари, маданий тадбирлар ўтказишга мўлжалланган амфитеатр, қадимий ҳовлилар, устахоналар, айвонлар, чойхоналар ва миллий анъаналаримиз акс этган этнографик шаҳарча қурилади.
Наврўзда маданиятимиз ва қадриятларимизнинг барча жиҳатлари намоён бўлади. Бу боғ ана шу бой миллий меросимизни тараннум этадиган жой бўлиши керак, деди Президентимиз. Бу ерга сайёҳлар ҳам иштиёқ билан келиши, ўзини худди ўзбек маҳалласида юргандек ҳис қилиши зарур. Ҳар бир бино, ўтказиладиган ҳар бир тадбир ўсиб келаётган ёшларни Ватанга муҳаббат, миллий қадрият ва анъаналаримизга ҳурмат руҳида тарбиялаш, ўзлигини англашга ҳисса қўшиши лозим.
Давлатимиз раҳбари лойиҳаларни янада такомиллаштириш, Наврўз байрамини халқ сайли тарзида ўтказиш бўйича тавсия ва кўрсатмалар берди.
***
Метронинг Юнусобод йўли қурилиши тезлаштирилади
Президентимиз Шавкат Мирзиёев 9 февраль куни пойтахтимизда амалга оширилаётган бунёдкорлик ва ободонлаштириш ишлари билан танишиш, халқ билан мулоқот қилиш мақсадида Юнусобод туманида бўлди.
Тошкент шаҳрида сўнгги йилларда мисли кўрилмаган миқёсдаги бунёдкорлик ишлари амалга оширилди. Бугун пойтахтимиз том маънодаги қурилишлар майдонига айланди. Янгидан-янги иншоотлар, корхоналар, тиббиёт ва таълим муассасалари, спорт мажмуалари, равон йўллар, кўприклар, маҳалла гузарлари, бозорлар, боғлар, хиёбонлар қуриб, фойдаланишга топширилди. Бу борадаги ишлар Президентимиз Шавкат Мирзиёев раҳнамолигида жадаллик билан давом эттирилмоқда.
Давлатимиз раҳбари Тошкент метрополитени Юнусобод йўналиши 2-босқич қурилиш ишларини кўздан кечирди.
Тошкент метрополитени 40 йилдан ортиқ тарихга эга. У Ўрта Осиёда ягона бўлиб, 1977 йил ноябрь ойида қатъий жадвал бўйича ҳаракатлана бошлаган.
Тошкент метрополитени йўловчиларни ташишдаги қулайлик ва хавфсизлик нуқтаи-назаридан энг самарали транспорт воситаси ҳисобланади. Маълумотларга кўра, ушбу транспорт хизматидан кунига 200 мингга яқин йўловчи фойдаланади.
Президентимиз ташаббуси билан Тошкент метрополитени Юнусобод линиясининг иккинчи босқичини бунёд этиш ишлари жадал амалга оширилмоқда.
Шавкат Мирзиёев қурилиш ишлари билан танишар экан, бу каби мураккаб жараён нафақат маблағ, балки ақлий меҳнат ва юксак маҳорат, чуқур билим ва тафаккур, юқори технологияларни талаб қилишини таъкидлади.
Метронинг тоннель асосини яратиш мақсадида 305 метрда бетон ишлари бажарилган ва 330 та йиғма темир-бетон конструкциялари ўрнатилган. Тупроқ кўчишини олдини олиш учун 128 та бетон устун тўлиқ ўрнатилган. Метронинг якуний қисмида “Туркистон” бекатини қуриш ишлари олиб борилмоқда.
Энг асосий масала пойтахтимиз кўчаларидаги тирбандликнинг олдини олиш. Бунда метро энг қулай воситадир, деди Шавкат Мирзиёев. Жамоат транспорти ҳаракатида режали жадвални шакллантириш керак. Яъни автобус ҳам, метро ҳам бир йўналишда ҳаракат қилмаслиги, бир бирини такрорламаслиги керак. Бунинг учун бекатлар бўйича мониторинг олиб бориш зарур.
Қурилишга 200 дан ортиқ ишчи ва муҳандис, 40 та техника ва механизм жалб этилган. Метро қурилишига Германиядан ер ости тоннелини қазиш комплекси олиб келиниб, ушбу техника Германиялик мутахассислар билан бирга йиғилмоқда. Германиядан бурғулаш ва темир-бетон қозиқ қоқиш техникалари, 2 та 220 тонналик, 3 та 70 тонналик ва Хитойдан 10 та 50 тонналик кранлар олинган.
Қурилаётган метро участкасининг узунлиги 2,9 километр бўлиб, уни 2019 йилда фойдаланишга топширилиши мўлжалланган.
Президентимизга метро бекатларининг кўриниши, уларни замонавий ва миллий анъаналар асосида қуриш ва безаш бўйича маълумот берилди. Метро қурилишида ишлатилаётган техникалар намойиш этилди.
Шу ерда Тошкент шаҳри бўйлаб барпо этилаётган ер усти метроси қурилиши ҳақида ҳам маълумот берилди.
Шавкат Мирзиёев мутахассислар билан суҳбатлашиб, тегишли кўрсатмалар берди.
Абу Бакир Ўрозов, ЎзА
Сўнгги фикрлар