Президентимиз Шавкат Мирзиёев ташаббуси билан Чилонзор туманида барпо этиладиган масжидга Шайх Муҳаммад Содиқ Муҳаммад Юсуф номи бериладиган бўлди.
Давлатимиз раҳбари Тошкент шаҳридаги бунёдкорлик ишлари билан танишуви жараёнида мазкур масжид майдонига ташриф буюрди.
Шайх Муҳаммад Содиқ Муҳаммад Юсуф нафақат юртимизда, балки бутун ислом оламида тан олинган олим эди, деди Шавкат Мирзиёев. Ҳаётини муқаддас динимиз арконларини ўрганишга ва тарғиб этишга, халқимиз, ёшларимизни диний маърифат руҳида тарбиялашга бағишлади.
Дарҳақиқат, Шайх Муҳаммад Содиқ Муҳаммад Юсуф 1989 йилда, жуда қийин ва мураккаб даврда Ўрта Осиё ва Қозоғистон мусулмонлари диний идораси раиси, муфтий бўлди. Бу давр исломий илмлар, диний қадрият ва анъаналар қайта тикланган давр сифатида тарихимизда алоҳида ўрин тутади.
У киши ислом оламида маълум ва машҳур бўлган “Мухтасари Виқоя”, “Кифоя”, “Мазҳаблар – бирлик рамзи”, “Мазҳабсизлик – ислом шариатига таҳдид солувчи энг хатарли бидъат” каби китобларни ўзбек тилида шарҳлаб, ўша мураккаб йилларда кўпдан-кўп беҳуда ихтилофларнинг олдини олишга катта ҳисса қўшган.
Муфтий вазифасида у киши халқаро миқёсда ҳам кенг фаолият юритиб, кўплаб ислом мамлакатлари билан маданий-маърифий алоқаларни йўлга қўйиш ва ривожлантиришга эришган.
Шайх Муҳаммад Содиқ Муҳаммад Юсуф ҳам муфтий, ҳам собиқ Иттифоқ Олий кенгаши депутати сифатида ҳукуматга мусулмонларнинг ҳақ-ҳуқуқларини ҳурмат қилиш, улар учун зарур шароитлар яратиш масалалари кўтарилган махсус баённома тақдим этган.
Мустабид мафкура ҳукмрон бўлган ўша оғир замонда бундай ташаббус билан чиқиш, ҳеч шубҳасиз, катта жасорат эди, деди Президентимиз. Бунинг натижасида шўро ҳукуматининг мусулмонларга нисбатан сиёсати ўзгарган, масжид ва мадрасалар очилган, ҳаж зиёратига борувчилар кўпайган. 1990 йилда Марказий Осиё республикаларидан 500 нафар мусулмон Тошкент шаҳри орқали ҳаж зиёратига боришга муваффақ бўлган эди. Агар ўша даврда бутун собиқ Иттифоқ бўйича ҳар йили бор-йўғи 20-30 киши ҳажга борганини ҳисобга олганда, бу жуда катта натижа бўлган.
У кишининг дунё мусулмонлари ўртасидаги обрў-эътибори жуда баланд эди. Бу улуғ ватандошимиз Бутундунё мутафаккир уламолари йиғинининг Ижроия қўмитаси аъзоси, Бутунжаҳон мусулмон уламолари халқаро уюшмаси, Бутундунё Ислом уюшмаси каби нуфузли ташкилотларнинг, Иордания қироллик академиясининг ҳам аъзоси эди. У киши миср Араб Республикасининг “Нил лаври” олтин нишонига сазовор бўлганди. Шуни алоҳида таъкидлаш керакки, замонавий Ўзбекистон тарихида исломий илмлар бўйича ҳеч ким бу даражада юксак мавқега кўтарилмаган.
Бу улуғ аллома турли диний-маърифий мавзуларда 100 дан зиёд китоблар ёзган. Шайх ҳазратларининг ҳикматга тўла сўзлари, суҳбатлари, радио ва телевидение, матбуот саҳифаларидаги доимий чиқишлари, кўплаб китоблари, жумладан, аудиокитоблари орқали юртимиздаги ҳар бир хонадонга кириб борган.
Шайх Муҳаммад Содиқ Муҳаммад Юсуф ўзининг илми, сўзи ва ибратли амаллари билан она Ватанга, динимиз равнақига чин дилдан ҳалол хизмат қилиш бўйича катта бир мактаб яратиб кетдилар, десак, тўғри бўлади. У кишининг илм ва ҳаёт йўли, бой меросини ўрганиш ва халқимизга етказиш – барчамизнинг бурчимиздир.
Президентимиз Шавкат Мирзиёев ушбу масжид лойиҳаси билан танишар экан, уни янада такомиллаштириш, бунда халқимиз ва уламоларнинг таклифларини ҳам ўрганиш зарурлигини таъкидлади. Бу ҳақда Ўзбекистон Республикаси Президентининг Матбуот хизмати хабар берди.
http://uza.uz
***
Президент Шайх Муҳаммад Содиқ Муҳаммад Юсуфга қилинган туҳматлар ва ғийбатлар ҳақида эслади
Ўзбекистон
10:24
13572
Фото: KUN.UZ
Ўзбекистон Республикаси президенти Шавкат Мирзиёев Шайх Муҳаммад Содиқ Муҳаммад Юсуф ҳақидаги ўз хотиралари билан бўлишди. Бу ҳақдаги лавҳа «Ўзбекистон 24» телеканали эфирида намойиш этилган.
«Шайх Муҳаммад Содиқ Муҳаммад Юсуф ҳазратларини жуда ҳурмат қилардим, кўп учрашиб юрардим. Шу одам жуда кўп китоб ўқиган инсон эди. Менинг ўзим улар билан мулоқотда кўп бўлганман. Улар «Китоб ўқимаган одамнинг руҳияти ҳам, келажаги ҳам, умиди ҳам йўқ», дердилар. У одам араб тилини жуда мукаммал билар эди. Албатта, Имом Ал-Бухорий, Мотуридий, Ат-Термизий ҳақида гапирамиз. Лекин мустақил Ўзбекистонга ҳам шундай одам жуда керак бўлган, бу одам жуда ақлли бўлган. Ўрта Осиё ва Қозоғистон мусулмонлари идорасининг раиси, муфтий лавозимида ишлаганлар. Ўша пайтда Собиқ Иттифоқдан Ҳажга энг кўпи билан 20 инсон борган, лекин Ўрта Осиё ва Қозоғистондан 1990 йилда 500 нафар мусулмонни Ўзбекистондан жўнатишга ўзлари ҳаракат қилган. 90-йиллари Саудия подшоҳлигига ўзи бориб, 1 миллионта Қуръонни олиб келтирган. Ҳаёт бешафқат бўлади деганларидек, у одамга ҳам туҳмат, ғийбатлар кўп бўлган. 1993 йилда у одам кўчиб кетишга мажбур бўлади. Саудия Арабистонида яшаганлар, кейин 1994 йил Ливияга бориб, 2001 йилгача ўша ерда мусофирчиликда яшаб, кўп китоблар ёзганлар.
Очиғини айтсак, Эркин Воҳидов, Абдулла Орипов, Шайх Муҳаммад Содиқ Муҳаммад Юсуфга ўхшаган буюк одамлар ҳозир етишмаяпти. Қуръонни ўқиган ва уни илмий билган одам ҳеч қачон кам бўлмайди. У одамнинг билганини анча-мунча одам билмасди. Бундан ташқари, у одам кам ухлаб, кўп ёзиб, ўқир эди. Ҳар куни икки соат спорт билан шуғулланар эди. Биз мана шундай буюк одамларимизни тараннум қилсак кам бўлмаймиз. Китобларни араб, форс тилларидан ўзбек тилига таржима қилдирган одам улар. Қани бизда ҳозир шунақалар? Менга кўп ният қилар эдиларки, «Қани энди бизнинг давлатда ҳам яхши масжид бўлса-да, нурли исломни мен тушунтирсам», деб. Шунинг учун янги барпо этиладиган масжидга Шайх Муҳаммад Содиқ Муҳаммад Юсуф номи берилади, у ерда музей ташкил қилинади», — деди Шавкат Мирзиёев.
Эслатиб ўтамиз, 9 февраль куни Шавкат Мирзиёев ташаббуси билан Чилонзор туманида барпо этиладиган масжидга Шайх Муҳаммад Содиқ Муҳаммад Юсуф номи берилиши хабар қилинганди. Давлат раҳбари Тошкент шаҳридаги бунёдкорлик ишлари билан танишуви жараёнида мазкур масжид майдонига ҳам ташриф буюрганди.
Сўнгги фикрлар