Янги китоб: «Ўзбекнинг ёмони бўлмайди»

Тўпламдан адибнинг ёшларни ватанпарварлик руҳида тарбиялашга қаратилган бағишлов, қасида ва назиралари, ҳажвий характерга эга, ҳазил-мутойибага бой шеърлари ўрин олган.

Тўлқин Эшбекни кўпчилик публицист, яна кимлардир педагог сифатида яхши танийди. Аммо унинг шеър ёзишидан аксариятимизнинг хабаримиз йўқ. Талабалик йилларидан бошлаб шеърий машқлари газета ва журналларда чоп этилган Тўлқин Эшбек курсдошлари даврасида ўтказиладиган шеърхонликларда фаол иштирок этган. Ушбу китобга ҳам ижодкорнинг йиллар давомида ёзилган ва мамлакатимиздаги нуфузли вақтли нашрларда чоп этилган шеърлари киритилган.

– Китоб ижодкорнинг фарзанди, – дейди Тўлқин Эшбек. – Ушбу китобга назмда битган асарларимни саралаб, ўқувчиларга тақдим этишга ҳаракат қилдим. Шеърий тўпламим Ўзбекистон Республикаси фан арбоби, профессор Умарали Норматов сўз бошиси билан чоп этилди. Шеърлар устида бир муддат ишлашга тўғри келди. Янги Ўзбекистонимизнинг фаровон кунларига аталган назмда битилган асарларимни ҳам киритишга қарор қилдим.

Китоб уч минг ададда, Феруза Қувонова муҳаррирлигида чоп этилган.

Д.Маматова, ЎзА