ҚИШ ВА АРЧА БАЙРАМИ

QISH VА АCHА BАYRАMI

Болалик давримиз (1970 йиллар) қиш манзараси ўзгача эди. Ҳар тонгда тизза бўйи ёққан қорни кураб, Қорбобо ясардик. Янги йилда мактабимизда Арча байрами жуда завқли бўларди. Ўқитувчи Ўктам акам “Қорбобо” ролини қойилмақом қилиб ижро этарди.

Энди ҳаммаси ширин тушга айланди…

“Хотира” дафтаримдан

 

Болаликда қиш фасли оппоқ қор куратарди,

Телпак устидан опам рўмолин ўратарди.

Мактабгача акамлар кўтарарди сўмкамни,

Уларга етай дея қўлтиқлардим ўпкамни.

Қўяр эдим оёғим олдда солинган изга,

Шу ҳолда ҳам қалин қор етар эди нақ тизга!

Мактаб қий-чув макони: яхмалагу қорбўрон!

Гуриллаган печларнинг турбаси солар сурон.

Иссиқ синфхонада ловуллайди яноқлар,

Пахтадай оқ қорларга тўлиб қолган чаноқлар.

Ҳовлиларда чирқиллаб чумчуқчалар излар дон,

Томлар четида осиқ сумалаклардан маржон.

Арча байрамда илк бор ўқиган эдим шеърим,

Адашиб, пешонамни қоплаган муздай терим.

Устимдан кулишмаган, ҳеч ким демаган: “Оббо!”,

Елкамга қоқиб қўйган эркалатиб Қорбобо.

Юриш-туриши таниш, қилиқлари, сўзлари,

Акамга ўхшаб турар кулиб турган кўзлари!

Олтмишимда ҳаммаси айланиб қолди тушга,

Болалик хотирасин ҳаққим йўқ унутишга…

Байрам қадрини билган умри байрам бўларкан,

Ширин хотиралардан мудом завққа тўларкан!..

 

Тўлқин ЭШБЕК

2023 йил 24 декабрь

*** 

QISH VА АCHА BАYRАMI

Bolalik davrimiz (1970 yillar) qish manzarasi o`zgacha edi. Har tongda tizza bo`yi yoqqan qorni kurab, Qorbobo yasardik. Yangi yilda maktabimizda Аrcha bayrami juda zavqli bo`lardi. O`qituvchi O`ktam akam “Qorbobo” rolini qoyilmaqom qilib ijro etardi.

Endi hammasi shirin tushga aylandi…

“Xotira” daftarimdan

 Bolalikda qish fasli oppoq qor kuratardi,

Telpak ustidan opam ro`molin o`ratardi.

Maktabgacha akamlar ko`tarardi so`mkamni,

Ularga yetay deya qo`ltiqlardim o`pkamni.

Qo`yar edim oyog`im oldda solingan izga,

Shu holda ham qalin qor yetar edi naq tizga!

Maktab qiy-chuv makoni: yaxmalagu qorbo`ron!

Gurillagan pechlarning turbasi solar suron.

Issiq sinfxonada lovullaydi yanoqlar,

Paxtaday oq qorlarga to`lib qolgan chanoqlar.

Hovlilarda chirqillab chumchuqchalar izlar don,

Tomlar chetida osiq sumalaklardan marjon.

Аrcha bayramda ilk bor o`qigan edim sheʼrim,

Аdashib, peshonamni qoplagan muzday terim.

Ustimdan kulishmagan, hech kim demagan: “Obbo!”,

Yelkamga qoqib qo`ygan erkalatib Qorbobo.

Yurish-turishi tanish, qiliqlari, so`zlari,

Аkamga o`xshab turar kulib turgan ko`zlari!

Oltmishimda hammasi aylanib qoldi tushga,

Bolalik xotirasin haqqim yo`q unutishga…

Bayram qadrini bilgan umri bayram bo`larkan,

Shirin xotiralardan mudom zavqqa to`larkan!..

 

To`lqin ESHBEK

2023 yil 24 dekabr