Қонунни ўрганган ёшларнинг келажаги порлоқдир

Ҳаётимизда ҳар бир қонуннинг ўз ўрни бор.

Уларни пухта ўрганганлар аввало ўз ҳақ-ҳуқуқларини яхши биладилар. Ҳуқуқий маданияти юксак инсон шунга яраша фаровон ҳаёт кечиради.

Мирзо Улуғбек номидаги Ўзбекистон Миллий университетида 26 сентябрь куни “Ўзбекистон Республикасининг “Ёшларга оид давлат сиёсати тўғрисида”ги Қонуни – талаба-ёшлар ҳаётининг ҳуқуқий кафолатлари” мавзуига бағишланган республика илмий-амалий анжуманида бу ҳақда атрофлича фикр юритилди.

Ўзбекистон Республикаси Олий ва ўрта махсус таълим вазирлиги ҳузуридаги “Маънавият ва маърифат” маркази, республика Маънавият тарғибот маркази, “Ёшлик” Талабалар шаҳарчаси, Мирзо Улуғбек номидаги Ўзбекистон Миллий университети томонидан ташкил этилган анжуманда профессор-ўқитувчилар, ёш тадқиқотчилар ва иқтидорли талабалар иштирок этдилар.

Унда Ўзбекистон Миллий университети ректори Абдураҳим Абдушукуров, Олий ва ўрта махсус таълим вазирлиги ҳузуридаги “Маънавият ва маърифат” маркази мутахассиси Икром Чориев ва бошқалар Ўзбекистон Республикаси Президенти вазифасини бажарувчи Шавкат Мирзиёев томонидан 2016 йил 14 сентябрь куни имзоланган ва расмий эълон қилинган кундан кучга кирган Ўзбекистон Республикасининг “Ёшларга оид давлат сиёсати тўғрисида”ги Қонуни талаба-ёшларимиз ҳаётида, чунончи, жамиятимиз тараққиётида қанчалик муҳим ўрин тутишини алоҳида таъкидладилар.

Анжуман иштирокчилари юридика фанлари доктори Феруза Муҳитдинованинг “Ёшларга оид давлат сиёсати тўғрисида”ги қонуннинг жамият тараққиётидаги ўрни”, ЎзМУ Мураббийлар кенгаши раиси Аброр Хидировнинг “Талаба-ёшларни баркамол инсон қилиб тарбиялашда “Ёшларга оид давлат сиёсати тўғрисида”ги қонуннинг аҳамияти”, ЎзМУ Журналистика факультети доценти, Ахборот хизмати раҳбари Тўлқин Эшбекнинг “Оммавий ахборот воситаларида қонунлар ва уларга шарҳларнинг ёритилиши ҳамда талабаларнинг фикрномалари” мавзуидаги маърузаларини катта қизиқиш билан тингладилар.

Маърузаларда қайд этилганидек, мазкур қонунда ўн тўрт ёшга тўлган ва ўттиз ёшдан ошмаган шахслар – ёшлар (ёш фуқаролар), олий ёки ўрта махсус, касб-ҳунар таълими муассасасини битирган, таълим муассасасини битирганидан сўнг олган ихтисослиги бўйича уч йил ичида ишга кирган ва маълумоти тўғрисидаги ҳужжатда кўрсатилган ихтисослиги бўйича ишлаётганига уч йилдан кўп бўлмаган ўттиз ёшдан ошмаган ходим – ёш мутахассис деб эътироф этилиши изоҳлаб берилди.

– Мазкур анжуманда биз иқтидорли ва истеъдодли ёшларни давлат томонидан қўллаб-қувватланиши, фан, маданият ва санъат соҳасида ижодий устахоналар ва мактаблар, таълим муассасаларида спорт секциялари, фан, техника тўгараклари ва ижодий тўгараклар фаолиятини ташкил этилишининг қонуний кафолатлари ҳақида етарли даражада тушунчага эга бўлдик,– дейди Тарих факультети талабаси Насиба Нарзуллаева.– Иқтидорли ва истеъдодли ёшларни рағбатлантириш мақсадида танловлар, олимпиадалар, кўргазмалар, фестиваллар, кўриклар, концертлар, симпозиумлар, ўқишлар, конференциялар, семинарлар ташкил этилиши, ёшларга оид халқаро тажриба алмашуви, иқтидорли ва истеъдодли ёшларни таълим ва илмий-тадқиқот муассасаларида, шу жумладан хорижий мамлакатларда ўқитиш, қайта тайёрлаш ва амалиётни ўташ дастурларидан танлов асосида фойдаланишини таъминлаш борасида шунчалик кенг имкониятлар яратилиши барчамизни янада илҳомлантиради, келажакка умид ҳамда ишонч уйғотади.

Анжуманда тингловчилар мазкур қонун юзасидан ўзларини қизиқтирган саволларига атрофлича жавоблар олдилар.

 Улуғбек Усмонов,

журналист

 ***

 Qonunni o`rgangan yoshlarning kelajagi porloqdir

 Hayotimizda har bir qonunning o`z o`rni bor. Ularni puxta o`rganganlar avvalo o`z haq-huquqlarini yaxshi biladilar. Huquqiy madaniyati yuksak inson shunga yarasha farovon hayot kechiradi.

Mirzo Ulug`bek nomidagi O`zbekiston Milliy universitetida 26 sentyabr kuni “O`zbekiston Respublikasining “Yoshlarga oid davlat siyosati to`g`risida”gi Qonuni – talaba-yoshlar hayotining huquqiy kafolatlari” mavzuiga bag`ishlangan respublika ilmiy-amaliy anjumanida bu haqda atroflicha fikr yuritildi.

O`zbekiston Respublikasi Oliy va o`rta maxsus ta’lim vazirligi huzuridagi “Ma’naviyat va ma’rifat” markazi, respublika Ma’naviyat targ`ibot markazi, “Yoshlik” Talabalar shaharchasi, Mirzo Ulug`bek nomidagi O`zbekiston Milliy universiteti tomonidan tashkil etilgan anjumanda professor-o`qituvchilar, yosh tadqiqotchilar va iqtidorli talabalar ishtirok etdilar.

Unda O`zbekiston Milliy universiteti rektori Abdurahim Abdushukurov, Oliy va o`rta maxsus ta’lim vazirligi huzuridagi “Ma’naviyat va ma’rifat” markazi mutaxassisi Ikrom Choriyev va boshqalar O`zbekiston Respublikasi Prezidenti vazifasini bajaruvchi Shavkat Mirziyoyev tomonidan 2016 yil 14 sentyabr kuni imzolangan va rasmiy e’lon qilingan kundan kuchga kirgan O`zbekiston Respublikasining “Yoshlarga oid davlat siyosati to`g`risida”gi Qonuni talaba-yoshlarimiz hayotida, chunonchi, jamiyatimiz taraqqiyotida qanchalik muhim o`rin tutishini alohida ta’kidladilar.

Anjuman ishtirokchilari yuridika fanlari doktori Feruza Muhitdinovaning “Yoshlarga oid davlat siyosati to`g`risida”gi qonunning jamiyat taraqqiyotidagi o`rni”, O`zMU Murabbiylar kengashi raisi Abror Xidirovning “Talaba-yoshlarni barkamol inson qilib tarbiyalashda “Yoshlarga oid davlat siyosati to`g`risida”gi qonunning ahamiyati”, O`zMU Jurnalistika fakulteti dotsenti, Axborot xizmati rahbari To`lqin Eshbekning “Ommaviy axborot vositalarida qonunlar va ularga sharhlarning yoritilishi hamda talabalarning fikrnomalari” mavzuidagi ma’ruzalarini katta qiziqish bilan tingladilar.

Ma’ruzalarda qayd etilganidek, mazkur qonunda o`n to`rt yoshga to`lgan va o`ttiz yoshdan oshmagan shaxslar – yoshlar (yosh fuqarolar), oliy yoki o`rta maxsus, kasb-hunar ta’limi muassasasini bitirgan, ta’lim muassasasini bitirganidan so`ng olgan ixtisosligi bo`yicha uch yil ichida ishga kirgan va ma’lumoti to`g`risidagi hujjatda ko`rsatilgan ixtisosligi bo`yicha ishlayotganiga uch yildan ko`p bo`lmagan o`ttiz yoshdan oshmagan xodim – yosh mutaxassis deb e’tirof etilishi izohlab berildi.

– Mazkur anjumanda biz iqtidorli va iste’dodli yoshlarni davlat tomonidan qo`llab-quvvatlanishi, fan, madaniyat va san’at sohasida ijodiy ustaxonalar va maktablar, ta’lim muassasalarida sport seksiyalari, fan, texnika to`garaklari va ijodiy to`garaklar faoliyatini tashkil etilishining qonuniy kafolatlari haqida yetarli darajada tushunchaga ega bo`ldik,– deydi Tarix fakul`teti talabasi Nasiba Narzullayeva.– Iqtidorli va iste’dodli yoshlarni rag`batlantirish maqsadida tanlovlar, olimpiadalar, ko`rgazmalar, festivallar, ko`riklar, konsertlar, simpoziumlar, o`qishlar, konferentsiyalar, seminarlar tashkil etilishi, yoshlarga oid xalqaro tajriba almashuvi, iqtidorli va iste’dodli yoshlarni ta’lim va ilmiy-tadqiqot muassasalarida, shu jumladan xorijiy mamlakatlarda o`qitish, qayta tayyorlash va amaliyotni o`tash dasturlaridan tanlov asosida foydalanishini ta’minlash borasida shunchalik keng imkoniyatlar yaratilishi barchamizni yanada ilhomlantiradi, kelajakka umid hamda ishonch uyg`otadi.

Anjumanda tinglovchilar mazkur qonun yuzasidan o`zlarini qiziqtirgan savollariga atroflicha javoblar oldilar.

 Ulug`bek Usmonov,

jurnalist