Ҳашар кўтаринки руҳда ўтди

Мирзо Улуғбек номидаги Ўзбекистон Миллий университети теварак-атрофини бамисоли биҳиштга қиёс қиладилар

Она табиат гўзаллигига пайваста бу манзаралар университет жамоаси саъй-ҳаракатлари, вақти-вақти билан ўтказиладиган ҳашарларда шижоаткорона меҳнатлари туфайли вужудга келганини изоҳлашга ҳожат йўқ.

Ўзбекистон Республикаси Президентининг 2016 йил 1 июлдаги “Рамазон ҳайитини нишонлаш тўғрисида”ги қарорида муборак Рамазон ҳайитининг маънавий ҳаётимизда эзгулик, шукроналик, меҳр-оқибат каби олижаноб қадриятларни қарор топтиришдаги ўрни ва аҳамиятини инобатга олиб, миллий-диний анъаналаримизни асраб-авайлаш ва улуғлаш масалаларига алоҳида эътибор қаратилган.

Шу муносабат билан ЎзМУда 2-3 июль кунлари ҳашар ўтказилди. Унда университет профессор-ўқитувчилари ва ходимлари фаол иштирок этдилар. Баҳорда экилган гуллар ва бошқа кўчатларга ишловлар берилди. Университет – ҳудудида кенг миқёсда тозалаш, саришталаш ишлари амалга оширилди.

– Бундай эзгу ишларни йил бўйи давом эттирсак арзийди,– дейди ЎзМУ Касаба уюшмаси раиси Нўъмонжон Мамадалиев.– Миллий университетимиз ва бошқа иншоотларимиз ҳудудидан тортиб йўллар ва йўлакларгача баҳорда минг-минглаб туп гул кўчатлари ўтқазилган. Улар муттасил парваришни талаб этади. Қолаверса, обод масканда яшаш ва ишлаш учун ободонлаштириш, кўкаламзорлаштириш ишларини муттасил давом эттириш мақсадга мувофиқдир.

Эркин УСМОНОВ,

ЎзМУ газетаси мухбири