Танлов ғолиблари тақдирланди

Талабалик – олтин давр, дейдилар.

Бу даврнинг қанчалик олтинга тенглиги – ўқиш, билим олиш билан бир қаторда турли маънавий-маърифий тадбирлар, ижодий учрашувлар ва бошқа воқеликлар билан изоҳланади.

Мирзо Улуғбек номидаги Ўзбекистон Миллий университетида талабалик бахтига мушарраф бўлган йигит-қизлар ҳаётида унутилмас воқеалар кўп бўлади. Кунда-кунора университетда, талабалар турар-жойларида ва бошқа масканларда ўтказиладиган маънавий-маърифий тадбирлар, танловлар уларнинг қалбларига бир умрга муҳрланиб қолаётган бўлса ажабмас.

Ана шундай тадбирлардан бири – 1-босқич талабалари ўртасида ўтказилган “Гўзал ва бетакроримсан, муқаддас Ватаним, жоним сенга фидо, Ўзбекистоним!” шиори остида тақдимотлар танлови бўлди.

– Танловнинг дастлабки факультет босқичида 120 га яқин талабалар иштирок этган бўлса, демак, шунча истеъдод соҳиблари кашф этилди, десак айни ҳақиқатни айтган бўламиз,– деди ҳакамлар ҳайъати раиси, ЎзМУ проректори Давлатбой Жумабоев.– Танловдан кўзланган асосий мақсад – талаба-ёшларни маънан камол топтириш, мустақиллигимизнинг шонли ютуқларини ёшлар қалбига чуқур сингдириш, мамлакатимизнинг жаҳон ҳамжамиятидаги ўрнини чуқурроқ билиш, мустақил ва эркин фикрга эга истеъдодли ёшларни ҳар томонлама қўллаб-қувватлашдан иборат. Ўзбекистон Республикаси Олий ва ўрта махсус таълим вазирлигининг тегишли қарорида бундай тадбирлар юксак савияда ўтказилиши алоҳида таъкидланган. Албатта, танловга тайёргарлик жараёнидаёқ ўнлаб ёшлар чинакам истеъдодларини намоён этди. Ҳар бир факультетда бошланган танловнинг дастлабки босқичи рисоладагидек ўтди. “Гўзал ва бетакроримсан, муқаддас Ватаним, жоним сенга фидо, Ўзбекистоним!” деган битиклар оддий шиор эмас, балки, талаба-ёшлар қалб дафтарига умрбод муҳрланган энг оташин каломларга айланиб қолди. Улар энди ана шундай руҳда камолга етадилар!

Танловнинг университет босқичида иштирок этган 9 нафар ёш истеъдод соҳиби ўз тақдимотларини ҳавола этдилар.

Ҳакамлар ҳайъати мавзунинг тўлақонли очиб берилганлиги, мавзуни ёритишда адабиётлардан фойдаланганлик даражаси, ҳаётий мисоллар теран нигоҳ билан очиб берилганлиги, долзарб масалалар ва уларнинг ечимлари, таклифлари ҳамда ижодий ишлар услубий ва имловий тўғрилигига қараб баҳоладилар.

Юксак савияда ғоят қизиқарли ўтган танловда Кимё факультети талабаси Умида Ҳакимова 1-ўрин, Журналистика факультети талабаси Дилдора Тошева 2-ўрин, Тарих факультети талабаси Мавлуда Раҳмонова 3-ўринга муносиб кўрилди.

Ғолиблар университет фахрий ёрлиқлари, диплом ва қимматбаҳо совғалар билан тақдирландилар.

***

Шу ўринда айтиш жоизки, 2016 йил ёз ойларида университетимиз талабалари турли танловларда иштирок этишиб, ғолиблик шоҳсупасига кўтарилдилар.

Жумладан, 21 июнь куни ўтказилган “Кеча ким эдигу, бугун ким бўлдик, эртага қандай марраларни эгаллашимиз керак?” мавзусидаги мақолалар танловининг республика босқичида Иқтисодиёт факультети 3-босқич талабаси Дилноза Нишонова 2-ўринни эгаллади.

24 июн куни ўтказилган коррупцияга қарши кураш бўйича ижодий ишлар танловининг республика босқичида Журналистика факультети 2-босқич талабаси Исфандиёр Бургутбоев “Энг яхши иншо” номинацияси бўйича 3-ўринга муносиб кўрилди.

29 июнь куни ўтказилган “Жаҳолатга қарши маърифат” мавзусидаги иншолар танловининг республика босқичида Ижтимоий фанлар факультети 3-босқич талабаси Нозима Рустамова 1-ўринни, “Биз терроризмга қаршимиз” мавзусидаги иншолар танловининг республика босқичда Геология ва география факультети 3-босқич талабаси Шаҳноза Алимаҳаматова 2-ўринни, “Ўзбекистон тарихининг билимдони” танловининг республика босқичда Тарих факультети 3-босқич талабаси Рустамов Сардор Аваз ўғли 1-ўринни қўлга киритдилар.

“Қашқадарё вилоятидаги “Лочин” оромгоҳида 20-23 август кунлари ўтказилган “Юрт келажаги” республика иқтидорли ёшлар танловининг мамлакат босқичида Журналистика факультети 1-босқич магистранти Улуғбек Раҳмонқулов “Журналистика” номинацияси бўйича 1-ўринни эгаллади.

Миллий университетимизга муносиб иқтидорли, билимли ва фаол талабаларимизни эришган ютуқлари билан яна бир бор самимий қутлаб, келгуси ишларида янги зафарлар тилаб қоламиз.

 Жалолиддин Юсубов,

ЎзМУ иқтидорли талабалар билан ишлаш сектори раҳбари