ПАХТАЗОРДА ҚОЛГАН ИЗЛАР

“1980 йиллар талабалари айни шу кунларда ҳам қор-ёмғир остида пахта теришга мажбур эдик…”

“Хотира” дафтаримдан 

Суратларда:
1. ТошДУ (ҳозирги ЎзМУ) Журналистика факультети талабалари 1980 йилда Сирдарё вилояти «Оқолтин» тумани пахта далаларида (ўртадаги йигит Тўлқин Эшбек)
2. Пахтазорга ўғлининг ҳолидан хабар олиб келган раҳматли Усмон отам Эшбеков

***

Шитир-шитир ёмғир ёғар:

“Соғингандик кўп сени!”

Деразага ёмғир ёзар

Гўзал қизлар исмини.

Домламиз ҳам бемаҳалда

Уйғотишдан зериккан.

Шийпон шифтин тахталари

Кўҳналикдан чириккан.

Зериктирган сабоқлару,

Соғинтирган декан ҳам.

Кундан-кунга нонуштани

Хушон-хандон еган кам.

Ташқарида ёмғир ёғар,

Оралаб қор учқунлар:

“Ёғ, ёғавер ёмғиру қор,

Тўхтамасдан, уч кунлаб!”

Эсга тушар уйу танча,

Онам солган чўғлари.

…Мана, шифтдан илк чакки ҳам

Пешонамни «йўқлади».

Бошим ўраб, кўргим келар

Ширин тушим давомин:

”…Қайтаришсайди ўқишга,

Ётиб ўқирдим

Омин!”

Тўлқин ЭШБЕК

2023 йил 5 декабрь