Адиб ва олимнинг ибрат мактаби

Ўзбекистон Республикаси санъат арбоби, таржимон, адиб ва олим Иброҳим Ғафуров

китоблари, унинг таржимаси билан нашр этилган асарлар кириб бормаган хонадон, кутубхона топилмаса керак. Ана шу фидойи қалам соҳиби табаррук 80 ёш тўлди!

Шу муносабат билан Мирзо Улуғбек номидаги Ўзбекистон Миллий университетида Ўзбекистон Ёзувчилар уюшмаси билан ҳамкорликда адабий кеча бўлиб ўтди.

ЎзМУ ўқув ишлари бўйича биринчи проректори Давлатбой Жумабоев, филология фанлари доктори, профессор, фан арбоби Умарали Норматов ва бошқалар ёш авлодни она Ватанга муҳаббат ҳамда садоқат руҳида тарбиялашда миллий адабиётимизнинг ўрни, юртимизда ижод аҳлининг самарали меҳнат қилиши учун зарур шароит ва имкониятлар яратилаётганини таъкидладилар.

– Миллий университетимиз Ўзбекистон Ёзувчилар уюшмаси билан ҳамкорликда адабий кечалар, китобхонлик кунлари ўтказиши ўзига хос анъанага айланиб қолган. Бу талабаларимизнинг маънавий камол топишида муҳим аҳамият касб этмоқда,– деди ЎзМУ маънавий-маърифий ишлар бўйича проректор вазифасини бажарувчи Қодиржон Абдураҳимов.– Яқинда атоқли қирғиз ёзувчиси Чингиз Айтматов таваллуд кунига бағишлаб ўтказилган адабий кечамиз ҳам ктобхонларда бир олам таассурот қолдирди. Чингиз Айтматов ва бошқа кўплаб жаҳон мумтоз адибларининг асарларини она тилимизга маҳорат билан ўгирган атоқли адиб ва таржимон, адабиётшунос олим Иброҳим Ғофуров 1956-1961 йилларда мана шу даргоҳда таҳсил олган. Умрини адабиётга бахшида этган устознинг серқирра фаолияти бугунги талаба-ёшларимиз учун улкан ибрат мактабидир.

Тадбирда иштирок этишган таниқли адиб, шоир ва адабиётшунослар Ҳамидулла Болтабоев, Хуршид Дўстмуҳаммад, Шодмон Отабек, Исмоил Маҳмуд, Турсун Али, Аҳмаджон Мелибоев ва бошқалар турли йилларда Иброҳим Ғофуров билан бир сафда фаолият кўрсатишгани, устоз билан ҳамнафас ижод қилганлари ҳақида фахр билан сўз юритдилар. Устоз адиб ва олимнинг «Гўзалликнинг олмос қирралари”, “Унутилмаган боғ”, “Жозиба”, “Ёнар сўз», “Ям-яшил дарахт”, “Юрак – аланга”, “Лириканинг юраги”, “Шеърият — изланиш демак”, “Ўттиз йил изҳори”, “Тил эркинлиги” сингари адабий танқидий, бадиа китоблари, “Дарвоза”, “Ҳумо қушим”, “Қалдирғочим” сингари шеърий насрлар, мансуралари, у она тилимизга маҳорат билан таржима қилган Чингиз Айтматовнинг “Қиёмат”, “Чингизхоннинг оқ булути” (Чингиз оқ булути), Доcтоевскийнинг “Жиноят ва Жазо”, “Телба”, “Қиморбоз”, Мопассаннинг “Азизим”, Хемингуейнинг “Алвидо, қурол”, “Чол ва Денгиз”, Распутиннинг “Ёнғин” сингари асарларини китобхонларнинг бебаҳо маънавий мулкига айланиб қолганини алоҳида таъкидладилар.

Адабий кечада сўзга чиққан устоз Иброҳим Ғофуровнинг хотиралари талабаларда катта таассурот қолдирди.

Улуғбек УСМОНОВ,

журналист