КУЙДИРМАЖОНЛАР

Шеърият шайдоларига шеър завқи

Ёшлик хатолардан хоҳ кул, хоҳ кулма,

Ақлинг тўлармиди улар бўлмаса?!

Эй инсон, шуҳратга қанчалар тўлма,

Зиндон бўлар дунё – бир бор кулмаса.

Биргина ўлимга йўқ эмиш чора,

Бир кунини кўрар – қул ҳам ўлмаса.

Олма гулларидир пушти, напармон,

Мевага йўл бермас, агар сўлмаса.

Вақт деганнинг сира келмас уйқуси,

Умрингдан ҳар сафар бир не юлмаса.

Кенг феъл – кетмас давлат ахир, биродар,

Кўз тўймайди зарра — кўнгил тўлмаса.

Шарбат қайнамаса шинни бўларми,

Йигит ҳам бир кун қариб қуюлмаса.

Инсон интилмагай – орзуга, бўйла,

Олис тоғлар яқиндай туюлмаса.

Севиб қолиш осон серсевги дилга,

Кемтик бўлар ўзи – бир суйилмаса.

Куйдиргижонлар кўп дилим ўртаган,

На билсун ишқда бир бор куйилмаса?!

Ўзни бахтли ошиқ биларди Тўлқин,

Ёржоним қовоғи ҳеч уюлмаса!

Тўлқин ЭШБЕК

Иштихоний ижод мактаби

2023 йил 2 август