Ayol umri

Talabalar ijodidan

 

AYOL UMRI

Ba’zi farzandlar ota-onalari oldidagi

burchlarini unutib qo‘yadilar

 Qoshi kamon, lablari g‘uncha

Osmondagi oyga o‘xshaydi.

Uyqu bilmay tonglar otguncha

Farzandim deb yonib yashaydi.

Alla aytib tonglari otar

Ayol umri shundayin o‘tar.

Murg‘ak bola ulg‘aydi mana

Ishga shoshar turib tong sahar

Demas, “Bir duo qiling, ona”

Bu farzandlik burchi-ku axir.

Ostonada bolasin kutar

Ayol umri shundayin o‘tar.

O‘sha jondan aziz farzandi

Bir kun bo‘lar umriga egov

Uni tashlab ketgan dilbandi

Tushiga ham kirsa keragov

Ko‘zlarida yoshlari qotar

Ayol umri shundayin o‘tar.

Tunlar keksa onaizorga

Sirdosh bo‘lar ko‘kdagi hilol

Bir onaning ko‘nglini olmoq

To‘rt farzandga keldimi malol.

Bor alamin ichiga yutar

Ayol umri shundayin o‘tar.

Qarilikning azobi qursin

Kampir bo‘ldi keraksiz buyum

Sho‘rlik boshin qayerga ursin

Mehr kutub yig‘laydi yum-yum,

Armon bilan quyoshi botar

Ayol umri shundayin o‘tar.

 

OTA-ONAMGA SO‘ZIM

 

Ota, egilmaydi meni meni deb boshing

Seni qoldirmasman malomatlarga.

Bugun yetolmasak, ozroq sabr qil

Ertaga yetamiz saodatlarga.

 

Ona, nigohlaring mayusmi yana

Men sabab dilingga yetdimi ozor.

Og‘rinsam, boshimda bo‘lib parvona

Kammidi tunlarining o‘tgani bedor

 

Ota, parvo qilma g‘iybatlarga hech

Qizing g‘ururingni toptab o‘tmaydi

Hali o‘gitlaring unutganim yo‘q

Ular xotiramdan o‘chib ketmaydi.

 

Ona, xavotirlar ezmasin ko‘ngling

Biz uchun baxtiyor kunlar keladi,

Sen kabi nomusli, pokiza qizing

Boshqalar bilmasa Xudo biladi.

 

Ota, yog‘dirdilar sha’nimga bo‘xton

Mayli, bugun menda yuzim bursinlar.

Oq libos kiyaman pok vijdon bilan,

O‘sha kun kelganda meni ko‘rsinlar.

 

Ona, quvonchlarga to‘lasan sen ham

Ko‘rib farzandlaring yetgan baxtini

Ko‘rasan, dunyodan so‘rab olaman

Ko‘zlaringdan oqqan yoshlar haqqini.

 

Ota, nega buncha ozurda ko‘ngling

Boshginangga bitgan sitammanmi men?

Axir meni deya ko‘p azob ko‘rding

Shularni unutsam, odammanmi men?

Ona, yuragingni biroz kengroq qil,

G‘amlaring baxtlarga do‘nadi bir kun

Otam omon bo‘lsin, sen ham omon bo‘l

Shodumon kunlarni ko‘rmoqlik uchun.

 

Biling, azizlarim, qadrdonlarim

Sizlarni qo‘ymasman malomatlarga

Ozroq sabr qiling, bugun yetmasak,

Ertaga yetamiz saodatlarga.

 

ONAJONIM

Bu she’r onamning tilidan yozilgan. Marhuma buvijonimning xotirasiga bag‘ishlanadi.

Xazonga to‘lmasdan bog‘larim

Yaratganga yetib ohlarim

Siz yig‘latib ketgan bu yarim

Ko‘nglim uchun qayting, onajon!

 

Sizni kutar bir suluv dildor

Vaslingizga u ham intizor

Onam deb aytolmagan bir bor

Singlim uchun qayting, onajon!

 

Kelin bo‘ldi mening Dinoram

Sizsiz o‘tdi to‘y, kelin salom,

Mayli ostonamdan bo‘lsa ham

Salom olib keting, onajon!

 

Mehringizga to‘ymagan uchqun,

Alp yigitlar safida bugun

Shu zabardast o‘g‘lingiz uchun

Suluv kelin toping, onajon!

 

Mayli ona, kelmasangiz ham,

Yonimizda turmasangiz ham,

Mayli uyga kirmasangiz ham,

Ko‘chamdan bir o‘ting, onajon!

 

Sizni sog‘inadi yuragim,

Zo‘rg‘a ovunadi yuragim,

Endi sizga yolg‘iz tilagim.

Qabrda tinch yoting, onajon!

 

Elmira XUDОYOROVA,

O’zMU Xorijiy filologiya fakulteti  1- kurs talabasi