ЎЗБЕК ВА ТОЖИК

Менга ёққан энг яхши, сермазмун шеър! Қанийди, ҳаммамиз шундай

беғубор қалб ила, ўзаро меҳр-оқибатли бўлиб яшасак, дейди Дониш домла узоқни ўйлаб.

Киприклари ўхшаш, кўзлари ўхшаш,
Қўшиқлари ўхшаш, сўзлари ўхшаш,
Икки томчи сувдек ўзлари ўхшаш,
Ажратиб кўринг-чи, ўзбекми, тожик?

Чопони, дўпписи, либоси бир хил,
Орияти бир хил, ибоси бир хил,
Дини, диёнати, дуоси бир хил,
Ажратиб кўринг-чи, ўзбекми, тожик?

Тоғаси ўзбегу тожик холадир,
Жияни тожигу ўзбек бўладир.
Ҳаттоки, гоҳида она-боладир,
Ажратиб кўринг-чи, ўзбекми, тожик?

Туташиб кетгандир томига томи,
Бир ёнда Навоий, бир ёнда Жомий.
Мирзо Турсунзода, Ғафур Ғуломи
Ажратиб кўринг-чи, ўзбекми, тожик?

Айирманг уларни у сан, бу сан деб,
Қариндош-қардошсан, яқин дўстсан деб,
Қабул қилаверинг Ҳасан — Ҳусан деб,
Ажратиб кўринг-чи, ўзбекми, тожик?

Худойберди КОМИЛОВ